တိမ်စိုင်တွေရယ်

မြူတွေရယ် နှင်းထုရယ်

မနက်ခင်းရယ်

သဲသဲကွဲကွဲမရှိတဲ့

ပုံရိပ်များရယ်

လီမှော်ရာသီတောင်ပေါ်မှာ

လမ်းကျဉ်းငယ်ကလေးများ

လျှောက်ရသလို

အကြင်နာလမ်းဟာ

ရီဝေဝါးနေတယ်

မရေရာဘူး

အမူအရာတွေများစွာ

ဘာသာပြန်ကြည့်လည်း

အတွေးများဟာ

အဖြေတမ်းဝေဝါးနေတယ်

သေချာတာတစ်ခုက

ကြည်ဖြူစွာနဲ့

တို့ကချစ်တယ်

ဒါပါပဲ

အချစ်လမ်း

လေးထဲ

လျှောက်နေရဦး

မယ်

ရေတံခွန်တွေရယ် အော်မြည်ကာ ပြင်းပြစွာရိုက်ခတ်စဉ်

လျှို့ဝှက်ချက်နဲ့ပြည့်တဲ့ ရေထွက်ရာ ရေဆန်ကိုလှန် ရှာဖွေစဉ်

ချောင်းဖျားခံ အစပြု စီးဆင်းရာနေရာမျိုးဟာ အကြင်နာစတင်ရာ

ညီမျက်ဝန်းလို အခြေအနေတွေတိုင်းကို ဆင်ခြင်လိုက်တိုင်းမှာ

မေးခွန်းတွေအပြည့်နဲ့ ဒွိဟတွေရယ် ကြင်နာသူအကြည့်တွေ

ဘာသာပြန်ဖို့ အခုထက်ထိတိုင် မလွယ်ကူတော့

အချစ်လမ်းနဘေးက အလွမ်းရွာရောက်ခဲ့ပြီ

ရောက်ရှိခဲ့တဲ့ အလွမ်းရွာမှာ ဆွေးဆွေးမြေ့မြေ့

ကိုယ့်အိမ်ရယ် ခြောက်ခြောက်ကပ်ကပ် နေ့တွေအလယ်

ဆုံးခြင်းမဲ့တဲ့ ဘာသာပြန်ရယ် မငိုချင်ဖူးကွယ်